اگطاع "الحسن ول سيد ابراهيم" و "محمد ول الهدارْ"

الحسن ولد محمدن ولد سيد ابراهيم :

محمد متوحـشْ ملگـاهْ *** نعْي كنتُ انَعْـيَ نتْـراهْ 
أكنْتَ اشْمذاكَ امْنينَ انْراهْ *** انرً بعْد اصْديگْ ءُ نبْغيـهْ 
غيرَ اليُومُ اسَبْحـانَ اللهْ *** كِيفَـلِّ ذَ كامـلْ ناسيـهْ 
مانِ عارفْ ذاكَ اشْوداهْ *** ألانِ نعْرفْ منهُ لمْوديـهْ 
يَكانُ سامـعْ فهْـلِ الـهْ *** عن شِي مانِ عالمْ بيـهْ 
واللً جابرْ حـدُ انَسًـاهْ *** فيَ هـذِ ماكانـتْ فيـهْ 
هوَ مـاهُ مـولَ نسيـانْ *** غير الدًهرَ اليومَ اتفُ بيهْ 
فيهْ الا يورَ شى ماكانْ *** يؤمل ْ عنُّ يورَ فيهْ

محمد ول هدارْ:

الحسًـن گالـنُّ فاغْـنـاهْ *** انسيـتُ وانَ ماننْـسـاهْ 
مَصِيبُ عنْ ذاكُ امَغْنـاهْ *** عنْ ذاكَانَ كنتَ امْواسيـهْ 
اكْبرْ هوَ واكبـرْ معْنـاهْ *** امْنِ اظَنَ اعْلـنِّ ناسِيـهْ 
بَسْمَ الْحالَ ننْسـاه اعْـلاهْ *** يبْغيـنِ حـتًـانَ نبْغـيـهْ 
يتْـرانِ حتًـانَ نـتْـراهْ *** ذالگالْ الحَسًنْ ظالمْ فيـهْ 
غيرِ الَي عادِ الاَ سگْـراهْ *** عنْ ذَ حدِ الِّ ظـنُ بيـهْ 
واعْل راصُ كبُ ارظـاهْ *** لـهِ ذاك ارظيـه اعْليـهْ 
وُور ذ ماتَ يفتـحْ بـابْ *** الشًوْفاتَ الِّ مَـا تعْنيـهْ 
رانِ بعدَ امْرظيـهُ اكَـابْ *** زادَ اعلَ راصُ وامْسكْريهْ

الحسن ولد محمدن ولد سيد ابراهيم :

حمـد ذلِ گايـلْ جـدْ *** فِيهُ اسَگْـرانِ وانَ جـدْ 
ذاكْ اعْلي غيرَ اصً بعْدْ *** گايلُّ منْ بـابْ التَّنبيـهْ 
أمنْ بابَ التوجيهَ انُّ حَدْ *** سگْر حدْ اگْبيلْ انَاديـهْ 
وامنادمْ باحْبيـبُ مهْتـمْ *** بيهْ ءُ سگراهْ اياكْ اعْليـهْ 
يَسًگْرَ كَـدً امنيـنْ اتـمْ *** اشْمَذاكْ اسَگْريهْ انَادِيهْ

محمد ول هدارْ:

الحسًـن كالـنُّ يخْتيـرْ *** حدً الاَ يحْرثْ فيهْ الخيرْ 
ابْنـدويَ زيـنَ تعْبيـرْ *** عنُ لهْ اسَگريهْ اعْليـهْ 
أذَ مسْتصعبْ حتُ يغيرْ *** الحسَّنْ شِي دارُ سَاويهْ 
گدْ امْنينُ اسْو مان گـادْ *** إدورْ انْسگْريهَ انْسگْريهْ 
أكدَ امْنينْ امَشيـلِ زَادْ *** ابـاًش انَاديـهَ انَاديـهْ

Distributed by Abu-Iyad